TechWire

යුනිකෝඩ් සහ සිංහල යතුරුලියනය

මෙම ලිපියෙන් මාගේ බලාපොරොත්තුව ප්‍රාදේශීයකරණය හෙවත් සිංහලට පරිවර්තනය සඳහා අවශ්‍ය වන තාක්‍ෂණික පසුබිම ගැන මූලික සටහනක් තැබීමටයි.

Official Unicode Consortium code chart

නිළ යුනිකෝඩ් කේත වගුව – සිංහල කොටස (මූලාශ්‍රය: විකිපීඩියා)

අන්තර්ජාලය තුළ සිංහල අකුරු සුලබව භාවිතාවනු දක්නට ලැබුණේ ‘යුනිකෝඩ්’ නම් කේතන ක්‍රමයේ ආගමනයෙන් පසුවයි. යුනිකෝඩ් ක්‍රමය යටතේ සෑම අක්‍ෂරයකටම, සෑම ඉලක්කමකටම සහ සෑම සංකේතයකටම අදාළ වන සම්මත ආවේණික ඉලක්කමක් ඇත. ක්‍රියාත්මක මෙහෙයුම් පද්ධතිය මත හෝ, ක්‍රියාත්මක පරිගණක වැඩසටහන මත හෝ පවතින භාෂාව මත හෝ මෙම ඉලක්කම රඳා නොපවතී. ඔබ මෙම ලිපිය විවිධ මෙහෙයුම් පද්ධති හරහා කියවුවහොත් විවිධ අකුරු හැඩ යටතේ දර්ශනය වුවද, අක්‍ෂරයන් වෙනස් නොවේ. යුනිකෝඩ් ක්‍රමයේ විස්මය එයයි. ඒ පිළිබඳ වැඩිදුර තොරතුරු යුනිකෝඩ් වෙබ්අඩවියෙන් දැනගත හැක.

 

යුනිකෝඩ් කේතන ක්‍රමය යටතේ සිංහල අකුරු යතුරුලියනය

ඔබ Windows පරිශීලකයෙකු නම් සියබස් (වර්තමානයේ ICTA) වෙබ් අඩවියට පිවිස ඔබේ Windows අනුවාදයට ගැලපෙන මෘදුකාංගයක් තෝරාගත හැක.

Mac OS පරිශීලකයින් හට ද අදාළ මෘදුකාංග එම අඩවියේ ඇතත් බාහිර මෘදුකාංගයකින් තොරව වූවද OS X පරිශීලකයින් හට සිංහලෙන් යතුරුලියනය කළ හැක. කළයුත්තේ System Preferences > Keyboard > Input Sources වෙත පිවිස එහි ඇති යතුරුපුවරු ලැයිස්තුවේ යටම ඇති ➕ සළකුණ එබීමයි. එවිට මතුවන ලැයිස්තුවේ පහළට ගියවිට Sinhala ලෙස යතුරු පුවරුවක් දිස් වේවි. එය තෝරා එක්කිරීම මඟින් සරලවම සිංහල යතුරුපුවරුව සක්‍රිය කරගත හැක.

Keyboard Input sources

OS X පරිශීලකයින් හට සිංහල යතුරුපුවරුව සක්‍රිය කරන අයුරු

Ubuntu භාවිත කරන්නන්ට sinhala.sourceforge.net අඩවියෙන් සිංහල ස්ථාපනය කරනයුරු දැනගත හැකිය.

ඊට අමතරව අන්තර්ජාලය තුළ ද යුනිකෝඩ් පරිවර්තන සේවා රාශියක් ඇත.

කොළඹ විශ්වවිද්‍යාල පරිගණක අංශය පවත්වාගෙන යන යුනිකෝඩ් එසැණින් පරිවර්තකය ඉන් ප්‍රධානය. Input Tools ද Google ආයතනය විසින් බාගත (download) කිරීමට ඉඩදෙන යුනිකෝඩ් පරිවර්තකයකි. ඔබට නිරතුරු අන්තර්ජාල පහසුකමක් ඇත්නම් අන්තර්ජාල යුනිකෝඩ් පරිවර්තකයක් භාවිතය පහසුදායක විය හැකි වුවද, ඔබගේ පරිගණකයේම යතුරුලියන මෘදුකාංගයක් ස්ථාපනය කරගැනීමෙන් ඕනෑම විටෙක සිංහල – ඉංග්‍රීසි අතර යතුරුපුවරු භාෂාව හුවමාරු කළ හැක.

iOS සහ Android මෙහෙයුම් පද්ධති භාවිතා කරන්නන් හට සිංහලෙන් ලිවීමට අවශ්‍යනම් ඊට ඇති පහසුම ක්‍රමය අයදුමක් (app) භාවිතා කිරීමයි. සන්හිඳ යනු iOS සහ Android දෙකෙහිම ධාවනය වන යුනිකෝඩ් පරිවර්තකයකි. හෙළකුරු ද iOS/ Android පද්ධති දෙකටම සහාය දක්වන සිංහල යතුරුපුවරුවකි. මීට අමතරව නොමිලේ ලබාදෙන තවත් විවිධාකාර යුනිකෝඩ් සහායක App Store සහ Play Store තුළින් සරල සෙවුමකින් සොයාගත හැක.

කෙනෙකුට යුනිකෝඩ් පරිවර්තකයක් භාවිතය වඩා පහසු වියහැකි අතර තවත් කෙනෙකුට සිංහල යතුරුපුවරුවක් භාවිතය වඩා වේගවත් විය හැක. කෙසේ වූවද, පුහුණුවීමේදී කාලයත් සමග කුමනාකාරයේ යතුරුලියනයක් වූවද ක්‍රමයෙන් පහසු වේ.

ඔබ භාවිත කරන මෙහෙයුම් පද්ධතිය කුමක් වූවද, යුනිකෝඩ් කේතන ක්‍රමය යටතේ සිංහල යතුරුලියනය පිළිබඳව පැහැදිලි අවබෝධයක් ඔබට ලැබුණු බව මාගේ හැඟීමයි. මීළඟ ලිපි වලදී අප එදිනෙදා සුලභව භාවිතා කරන වෙබ් අඩවි සහ සේවා ප්‍රාදේශීයකරණය කරන ආකාරය ගැන පැහැදිලි කිරීමක් බලාපොරොත්තු වන්න.

පහතින් ඇති ප්‍රතිචාර දැක්වීමේ පෝරමය ඔබේ සියළු අදහස්/ ගැටලු සඳහා විවෘතයි.

      

About author View all posts Author website

Chevindu Wickramathilaka

Walking is his favorite mode of travel and, comics are his favorite type of books. He can talk all day if needed and, stay silent all day if needed.
He keeps his friends close, his books closer.

Leave a Reply

Your email address will not be published. Required fields are marked *