TechWire

Author - Chevindu Wickramathilaka

තෙවන වරටත් ගුරුත්වජ තරංග නිරීක්ෂණය වේ!

2015 අවුරුද්දේ අන්තිම මාස කීපයේ දී, විද්‍යාඥයින් කීපදෙනෙක්ට පුළුවන් වුණා ලෝකෙම පුදුම කරවන්න. LIGO ආයතනයේ සේවය කරන මේ අය තමයි ලොව ප්‍රථම ගුරුත්වජ තරංග නිරීක්ෂණය සිදුකළේ. ඊට මාස කීපයකට පසුව ඔවුන්ට හැකි වුණා දෙවන වරට මේ අපූර්ව සංසිද්ධිය නිරීක්ෂණය කරන්න.

පසුගිය ජුනි 1 වෙනිදා ඔවුන් විසින් තුන්වන ගුරුත්වජ තරංග නිරීක්ෂණයක් සනාථ කරනු ලැබුවා: ආලෝක වර්ෂ බිලියන 3ක් විතර ඈත තිබුණු කළු කුහර දෙකක ඝට්ටනයක්. මේ සිදුවීම් නිසාවෙන් LIGO ආයතනය තීරණය කරලා තියෙනවා නූතන විද්‍යාවට අලුත් ශාඛාවක් එකතු කරන්න: ගුරුත්වජ තරංග තාරකා විද්‍යාව.

ගුරුත්වජ තරංග යනු මොනවාද?

ගුරුත්වජ තරංග කියන්නේ, අපිව වටකරගෙන ඉන්න අවකාශ-කාලය තුල ඇතිවෙන රැළිති ස්වභාවයන් ට. මේවා ඇතිවෙන්නේ නියුට්‍රෝන තාරකා, කළු කුහර වගේ අධික ස්කන්ධයක් තියෙන වස්තූන් වල චලනයන් නිසා. ඉතින් මේ වගේ වස්තූන් ගැටුනොත්, ඉතා විශාල ශක්තියක් නිකුත් වෙනවා. ගුරුත්වජ තරංග ඇතිවීම කියන්නේ මේ ශක්තිය නිකුත් වෙන එක්තරා ක්‍රමයක්. මේ ගැන සවිස්තරාත්මක ලිපියක් අපි කලින් ඉදිරිපත් කළා.

මෑතදීම සිදුකළ නිරීක්ෂණයට හේතු වුණු කළු කුහර දෙකේ ස්කන්ධය අපේ සූර්යයා තරම් 49 ගුණයකට ආසන්නයි. LIGO ආයතනය නිරීක්ෂණය කළ ගුරුත්වජ තරංග හටගැනුනේ මේ කළු කුහර දෙක එකිනෙකා වටා භ්‍රමණය වීමෙන් සහ ගැටීමෙන්. එම කණ්ඩායමට පුළුවන් වෙලා තියෙනවා මේ තරංග වල ස්වභාවයෙන්, එක් එක් කළු කුහරයේ භ්‍රමණය ගැනත් විස්තර ලබාගන්න.

වර්තමානය වන විට, මේ ගුරුත්වජ තරංග වලට සංවේදී වන නිරීක්ෂක දෙකක් පෘථිවියේ තියෙනවා. ඒ ලුයිසියානා සහ වොෂින්ටන් යන ප්‍රාන්ත දෙකේ. නමුත් නුදුරු අනාගතයෙදී අපිට තුන්වැන්නක් දැකගන්න පුළුවන් වෙයි: ඉතාලියේ Virgo සංවේදකය. විශ්වයේ රහස් ගැන තවමත් අඳුරේ අතපත ගානා අපට මේ නිරීක්ෂක පූර්වාලෝකයක් වනු නොඅනුමානයි.

ඡායාරූප – NASA

Gboard හි Android ආගමනය

Gboard හි මෙම Android ආගමනය සිදුවන්නේ සිය iOS නිකුතුවෙන් මාස හයකට පසුවය. Gboard යනු Google සමාගම විසින් හඳුන්වාදෙන, සිය යතුරුපුවරුවේ සහ සෙවුම් යන්ත්‍රයේ මුහුම් කිරීමකි. Android මෙහෙයුම් පද්ධතියකදී නම් මෙම අයදුම විසින් “Google Keyboard” ලෙස පෙර හැඳින්වුණු දුරකථනයේ සාමාන්‍ය යතුරුපුවරුව ප්‍රතිස්ථාපනය වනු ඇත. එනම් මෙම නව පිම්ම Google Keyboard 5.2 හි සිට Gboard 6.0 දක්වා වෙයි.

iOS වෙත Gboard හඳුන්වාදුන් මූලික විශේෂාංග මෙහිදී ද වෙනස් වී නොමැත. දැන් ඔබේ යතුරු පුවරුවට ඉහළින් කුඩාවට Google ලාංඡනය දිස්වේ. එමගින් ඔබ හට ඕනෑම අයදුමක් භාවිත කරමින් සිටියදීම ක්ෂණික ගූගල් සෙවුමක් කිරීමට පහසුකම සැලසේ. සෙවුම කළ පසු එතැනම ලැබෙන ප්‍රතිඵලයක් සඳහා වන Share බොත්තම මත ටැප් කළ සැණින්, එය ලිවීමේ ප්‍රදේශයට පිටපත් වේ. අයදුමෙන් අයදුමට මාරු වෙමින්, අකුරු පෙළ copy-paste කරමින් විඳීමට සිදුවන දුක් ගැහැට ගැන දන්නා පරිශීලකයින් හට මෙය සුබ ආරංචියක් වනු නොඅනුමානයි. මෙය Google Allo හි සිටිනා Google Assistant ගේ ක්‍රියාවලියට මදක් සමාන වුවද ඕනෑම අයදුමකදී භාවිතා කළහැකි බැවින් මෙය ඊට වඩා නම්‍යශීලී ය.

දැන් Android වෙත ද iOS හි මෙන් emoji සෙවුමක් ඇතුළත්ය. Emoji තේරීමේ බොත්තම ටැප් කිරීමෙන් පසුව එන සුපුරුදු emoji ලැයිස්තුවට ඉහළින් ඔබට දැන් සෙවුම් ප්‍රදේශයක් පවතී. ඔබට අවශ්‍ය අයිකනයට ආශ්‍රිත නමක් එහි ඉංග්‍රීසි අකුරින් ටයිප් කළ පසු අදාළ emoji එක දර්ශනය වනු ඇත. තවදුරටත් ඔබට අවශ්‍ය emoji එක සෙවීමට ටැබ් ගණන් පෙරළීමට වුවනාවක් දැන් නැත.

නව Gboard යතුරුපුවරුවේ GIF සෙවුමක් ද ඇතුළත් වන අතර, චංචල රූපයක් ක්ෂණිකවම ඔබේ ලිවීමේ ප්‍රදේශයට එමගින් පිටපත් කරගත හැක.

බොහෝ කලක පටන් තිබූ ඉල්ලීම් වල ප්‍රතිඵලයක් ලෙස දැන් ඉලක්කම් පේළිය ස්ථාවරව පෙන්වීමේ විකල්පයක් හඳුන්වා දී ඇත. අංකයක් ඇතුල් කිරීමට අවශ්‍ය නම් තවදුරටත් අකුරක් ටැප් කරගෙන සිටීමට හෝ වෙන මෙනුවකට යාමට වුවමනා නැත.

මේවාට අමතරව දැන් එකම යතුරුපුවරුවකින් බහු භාෂා auto-correct පහසුකම අත්විඳීමට ඔබට හැකිය. එනම් ඔබ සාමාන්‍ය English (US) යතුරුපුවරුවට අමතරව සිංහල යතුරුපුවරුව ද Gboard වෙත ඇතුළත් කර ඇත්නම්, ඔබ සිංහලෙන් ටයිප් කරන විට සිදුවන සුළු අතපසුවීම් ස්වයංක්‍රීයවම නිවැරදි විය යුතුය. ඒ කෙසේ වෙතත් සිංහල භාෂාව සම්බන්ධයෙන් මෙම පහසුකම තවමත් මූලික අවධියේ පවතී.

සිංහල යුනිකෝඩ් මගින් ටයිප් කිරීම සඳහා අතිශය බහුතරයකගේ තවමත් තේරීම හෙළකුරු අයදුමයි. එය සැබැවින්ම ඉතාමත් පහසුදායක අත්දැකීමක් වී ඇත්තේ එහි ඇති විජේසේකර යතුරුපුවරුවේ අක්ෂර පිළිවෙල නිසායි. නිතර භාවිතා වන අකුරු පහසු ස්ථානගත කිරීමකට ලක්කර ඇති නිසා වේගයෙන් ලිවීමට විජේසේකර අක්ෂර පිළිවෙල ඉතා වැදගත්ය. නමුත් අවාසනාවකට මෙන් නවතම Gboard හි සිංහල අකුරු පිළිවෙල සකස්වී ඇත්තේ හෝඩියේ අකුරු එන පිළිවෙලට ය. මෙයට හේතුව සිංහල සඳහා නිවැරදි Input Style එකක් Google සතුව තවමත් නොමැති වීමයි. එවන් පුවරුවකින් අකුරු තේරීමට යාම මහා හිසරදයක් වනු ඇත. එනිසා තවමත් ඔබේ සුපුරුදු හෙළකුරු අයදුමට කුඩම්මගේ සැළකිලි දැක්වීමට යාමෙන් වළකින්න, මන්ද තවමත් ඔබේ ගැලවුම්කරු ඔහුයි.

 

කෙසේ වෙතත් ඉංග්‍රීසි අක්ෂර පමණක් බොහෝවිට භාවිත කරන පරිශීලකයින් හට Gboard ඉතාමත් සතුටුදායක අත්දැකීමක් වනු ඇත. වචන සඳහා ලැබෙන යෝජනා පෙරදී ට වඩා සන්දර්භය සමග ගැලපෙන ඒවා වන අතර, Google සමාගම විසින් මෙම යතුරුපුවරුවට ද ස්වයං-ඉගෙනුම් තාක්ෂණය හැඩගස්වා ඇත. Android පරිශීලකයින්ගේ එදිනෙදා ජීවිතය පහසු කරලීමේ තවත් උපාංගයක් මෙසේ ඔබ වෙත ඉදිරිපත් වන අතර එහි අඩු ලුහුඬුකම් වාර්තා කිරීමට ඔබට Google Play Store හි Reviews පහසුකම ඔබට භාවිත කළ හැක.

ලාංකික චිත්‍රකතාවේ සිංහ උදානය – Lionborn

Sachi Ediriweera

සචී එදිරිවීර

අප සැවොම දන්නා සිංහබාහු පුරාවෘත්තය යළිත් අප අතර කතාබහට ලක්කරවමින්, ඉතිහාසගත කතාන්දරයක් මත පදනම් වූ ප්‍රථම ශ්‍රී ලාංකික චිත්‍ර කතාව ලෙස Lionborn එළි දැක්වෙන්නේ සචී එදිරිවීර නම් වූ තරුණ කලාකරුවාගේ උත්සාහයක ප්‍රතිඵලයක් ලෙසිණි. Filmbox ආයතනයේ ආරම්භකයා වන සචී එදිරිවීර කෙටි සිනමා අධ්‍යක්ෂකවරයෙකු ද වන අතර මෙය ඔහුගේ ප්‍රථම චිත්‍රකතා සංග්‍රහයයි. මොහු විශිෂ්ට නිර්මාණකරුවෙකු වන අතර, එම සිතුවම් වලින් ඔහුගේ Instagram ගිණුම විචිත්‍රවත් වී ඇත.

Lionborn හි කතා රචනය සහ සිතුවම් නිර්මාණය සචී එදිරිවීර විසින් වන අතර සිතුවම් වර්ණ ගැන්වීම සිදුවී ඇත්තේ ඇමරිකානු ජාතික ක්‍රිස් ලිස්මාන් විසිනි. මෙම මස 20 සහ 21 දෙදින තුළ පැවැත්වීමට නියමිත ලංකා කොමික් කොන් 2016 උළෙලේදී මෙම චිත්‍ර කතා සංග්‍රහය එළි දැක්වීමට නියමිතය. Read More

කිලෝග්‍රෑමයට නව අර්ථදැක්වීමක්?

ජාතික තාක්ෂණ සහ ප්‍රමිතීන් ආයතනය (NIST) කියන්නේ එක්සත් ජනපද වාණිජ දෙපාර්තමේන්තුවේ පිහිටලා තියෙන මිනුම් ප්‍රමිතිකරණ රසායනාගාරයක්. එතන සේවය කරන භෞතික විද්‍යාඥයින්ට මෑතකදී පුළුවන් වෙලා ප්ලාන්ක් නියතයට (h) ඉතාමත් නිවැරදි පාඨාංකයක් ලබාගන්න. මේක තමයි ඕනෑම ආකාරයක ස්කන්ධයක් මනින්නට තියෙන ලෝක සම්මත අන්තර්ජාතික ඒකකය වන “කිලෝග්‍රෑමය”ට තියෙන නිළ අර්ථදැක්වීම වර්ධනය කරන්න විද්‍යාඥයින් අරන් තියෙන අළුත්ම පියවර. Read More

ඔබේ iPhone දුරකථනයේ ඇති සැඟවුණු සැකසුම්

USSD (Unstructured Supplementary Service Data) කේත කියලා හඳුන්වන්නේ දුරකථන නිෂ්පාදන සමාගම් හෝ වෙනත් සේවාදායකයින් විසින්, අදාළ පරිගණක සමග දත්ත හුවමාරු කරගන්නට ඔබේ ජංගම උපාංග වලට ඔබ්බවා ඇති කේත වර්ගයක්. බොහෝ අවස්ථා වලදී නොදැනුවත්වම මෙම USSD කේතයන් කොතෙකුත් අපේ අතින් භාවිතා වෙනවා. උදාහරණයක් විදිහට ඔබේ Mobitel සිම්පතේ ගිණුම් ශේෂය විමසන්න භාවිතා කරන *100# කියන්නෙත් සරල USSD කේතයක්.

සේවා දායකයින් බොහෝ විට USSD කේත භාවිත කරන්නේ යම් යම් සේවාවන් සක්‍රිය කිරීමටයි (දත්ත පැකේජ සක්‍රිය කිරීම වැනි). එහෙත් දුරකථන නිෂ්පාදකයින් මේවා යොදාගන්නේ දුරකථනයේ ඇති විවධ සැකසුම් පහසුවෙන් සිදුකරගැනීමටයි. එනම් සාම්ප්‍රදායික සැකසුම් වෙත පිවිසිය හැකි රහස් දොරක් ලෙසටයි. Read More

Apple සහ FBI ආරවුල ගැන ඔබ දත යුතු සියල්ල

Apple සමාගම සහ FBI ආයතනය අතර ඇතිවී ඇති ආරවුල ගැන ඔබ දැනටමත් අසා ඇති බවට සැක නැත. අපගේ මේ සූදානම එම ගැටලුව පිළිබඳව නැවතත් මුල සිට අවධානය යොමු කිරීමටයි.

පසුගිය වසරේ දෙසැම්බර් 15 දින ඇමරිකා එක්සත් ජනපදයේ කැලිෆෝනියා ප්‍රාන්තයේ සැන් බර්නාඩීනෝ ප්‍රදේශයට එල්ල වූ ත්‍රස්ත ප්‍රහාරයකින් 14o දෙනෙකු මරණයට ලක්වූ අතර 22 ක පිරිසක් බරපතල ලෙස තුවාල ලද හ. මෙම ප්‍රහාරයට වගකිව යුතු යැයි සැළකුණු අය අතර Syed Rizwan Farook නැමැත්තෙකු ද සිටියේය.

පසුගිය පෙබරවාරි 9 වනදා FBI ආයතනය ප්‍රකාශ කර සිටියේ, මෙම ප්‍රහාරයට සම්බන්ධ අයවලුන්ගේ දුරකථනයන් අතර තමන්ට අගුළු ලිහීමට නොහැකි එක් දුරකථනයක් ඇති බවයි. එය මෙම Rizwan Farook භාවිත කළ iPhone 5C වර්ගයේ දුරකථනයයි.

Apple iPhone 5C මාදිලියේ දුරකථනයක්

Apple iPhone 5C මාදිලියේ දුරකථනයක්

FBI ආයතනයට මෙලෙස දුරකථනයට ඇතුල්වීමට නොහැකි වූයේ iPhone දුරකථන වල ඇති ප්‍රධාන ආරක්‍ෂක උපක්‍රම දෙකක් හේතුවෙනි.

ඉන් පළමුවැන්න නම් iPhone වලටම සුවිශේෂී අගුලු තිරය යි. මෙහිදී ඔබට දුරකථනයට පිවිසීමට අවැසි නම් එක්කෝ අදාල මුරපදය නිවැරදිව ඇතුළත් කළයුතුය; නැතහොත් නිවැරදි ඇඟිලි සළකුණ ලබාදිය යුතුය. ඇපල් සමාගම iOS මෙහෙයුම් පද්ධතිය නිමවා ඇත්තේ මෙම මුරපදය පරිගණක මෘදුකාංගයක් ඇසුරෙන් ඇතුළත් කළ නොහැකි වන ලෙසය. සරලව කිවහොත්, එය මිනිස් ස්පර්ශකින්ම ලබාදිය යුතු ය. තව ද, එක් වැරදි මුරපදයකින් පසුව ඊළඟ මුරපදය ඇතුළත් කිරීමේ අවස්ථාව දක්වා මිලි තත්පර 80ක ප්‍රමාදයක් පවතී. මෙය සාමාන්‍ය පුද්ගලයෙකුට සංවේදී නොවුණ ද වේගවත් නූතන පරිගණකයකට මෙය අධික කාලයකි. ඇපල් සමාගම මෙම ආරක්‍ෂණ පිළිවෙත් ගෙන ඇත්තේ brute force නැමැති විකේතන ක්‍රියාවලියෙන් සිය උපාංගයකට ඇතුළුවීමට ඇති හැකියාව ඉවත්කිරීමට ය.

දෙවැනි කරුණ නම් මුරපද ඇතුල්කිරීමේ දී යම්කිසි අසාර්ථක උත්සාහයන් ගණනකට පසුව, දුරකථනය විසින් ස්වයංක්‍රීයව එහි ඇති සියළු දත්ත මකා දැමීමයි. මෙම අසාර්ථක උත්සාහයන් ගණන තීරණය කරන්නේ අදාළ දුරකථනයේ හිමිකරුවා ය. මෙය iOS පද්ධතියට ආවේණික උපක්‍රමයක් නොවුණද, FBI ආයතනයට මෙම දුරකථනය සමග විනෝද වීමට ඇති හැකියාව මෙමගින් නැතිවී ඇත.

එහි ප්‍රතිඵලයක් ලෙස FBI ආයතනය ඇපල් සමාගමෙන් ඉල්ලා සිටියේ මෙම ආරක්‍ෂණ ක්‍රමෝපායන් මඟහැරවිය හැකි සුවිශේෂී iOS මෙහෙයුම් පද්ධතියක් අදාළ iPhone දුරකථනයේ RAM එකෙහි ධාවනය කරවීමට නිෂ්පාදනය කර දෙන ලෙසයි. (මෙම මෙහෙයුම් පද්ධතිය දැන් හැඳින්වෙන්නේ GovtOS ලෙසයි.) ඇපල් සමාගම එයට විරෝධය පෑවේ සිය නිෂ්පාදන සතු ආරක්‍ෂක මෙවලම් තර්ජනයට ලක්වන ලෙස කටයුතු නොකිරීමේ ප්‍රතිපත්තිය මත ය. FBI ආයතනය මෙයට ප්‍රතිචාර දැක්වූයේ අදාළ මෘදුකාංගය නිෂ්පාදනය කරන ලෙස, ෆෙඩරල් විනිසුරුවරයෙකු හරහා ඇපල් සමාගමට උසාවි නියෝගයක් නිකුත් කිරීමෙනි. මෙය සිතාසියක් නොවූ අතර, 1789 දී සම්මත වූ එක්සත් ජනපදයේ සියළු ආඥා පනත යටතේ නිකුත් කරන ලද්දකි.

මේ වනතුරු කිසිදු ආණ්ඩුවක් මෙවන් ඉල්ලීමක් කර නැති බවද ඔහු වැඩිදුරටත් පැවසීය.
සිය පාරිභෝගිකයින් වෙත ප්‍රසිද්ධ ලියුමක් ඉදිරිපත් කරමින් ඇපල් ආයතනයේ ප්‍රධාන විධායක නිළධාරී Tim Cook පැවසුවේ, එම නියෝගයට අවනත වීමට ඇපල් ආයතනය සූදානම් නැති බවයි. එහිදී ඔහු තවදුරටත් පැහැදිලි කළේ සිය මෙලෙස පසුදොරක් විවර කිරීමෙන් iPhone භාවිත කරන සියලුදෙනාගේම තොරතුරු වල රහස්‍යභාවයට එල්ල වන තර්ජනය යි. මෙවන් බලවත් ආයුධයක් වැරදි අත්වලට නොයෑම පිළිබඳව ගතහැකි හොඳම පියවර එවන් මෙහෙයුම් පද්ධතියක් කිසිදා නිර්මාණය නොකිරීම බව Tim Cook තරයේ අවධාරණය කරයි. මේ වනතුරු කිසිදු ආණ්ඩුවක් මෙවන් ඉල්ලීමක් කර නැති බවද ඔහු වැඩිදුරටත් පැවසීය.

ඇපල් ආයතනයේ විධායක නිළධාරීන් පවසන පරිදි සිය ආයතනය FBI වෙත මෙම ගැටලුවට විසඳුම් ලෙස විකල්ප හතරක් ලබාදී ඇත.

Screen_Shot_2016-02-19_at_6.00.08_PM.0

2015 ඔක්තෝබර් 19 දින සිට මෙම දුරකථනයට අදාළ iCloud ගිණුමේ තොරතුරු ගබඩා වීම ඇණහිට ඇත. එයට පැහැදිලි හේතුවක් තවමත් ඉදිරිපත්වී නැත. FBI අායතනය පවසන්නේ අදාළ ප්‍රාදේශීය නිළධාරීන් විසින් iCloud ගිණුමේ මුරපදය ප්‍රතිසකස් කිරීම හේතුවෙන් ස්වයංක්‍රීය දත්ත ගබඩාව සඳහා ඇති ඉඩකඩද ඇහිරී ඇති බවයි. ඊට පිළිතුරු ලෙස ප්‍රාදේශීය නිළධාරීන් පැවසුවේ, මෙම මුරපද වෙනස්කිරීම සිදුවූයේ FBI හි අනුදැනුම යටතේ බවයි.

කෙසේ වූවද ඇපල් ආයතනයේ මෙම විරෝධතාවට පිළිතුරු ලෙස, පෙබරවාරි 19 දින ඇමරිකානු අධිකරණ දෙපාර්තමේන්තුව නව අයදුම්පතක් ගොනුකරමින් ෆෙඩරල් විනිසුරන්ගෙන් ඉල්ලා සිටියේ ඇපල් ආයතනය හට නියෝගය සමග එකඟ වන ලෙස විධානය කරන ලෙසයි. එම අයදුම්පතෙහි, ඇපල් ආයතනයට සිය ව්‍යාපාර ස්ථානයේදීම ජංගම දුරකථනයට අදාළ මෘදුකාංගමය වෛරසය ඇතුළත් කළහැකි බවත්, FBI ආයතනය විසින් දුරස්ථ සබඳතාවක් ඔස්සේ ජංගම දුරකථනයට ඇතුල්වී අදාළ තොරතුරු පිටපත් කරගත් පසුව, ඇපල් සමාගමට එම වෛරසය නැවත ඉවත්කර විනාශකර දැමිය හැකි බව සඳහන් විය.

මේ පිළිබඳව අදහස් දැක්වූ Tim Cook පැවසුවේ, GovtOS මෙහෙයුම් පද්ධතිය ඇපල් ආයතන පරිශ්‍රයෙන් පිටතට නොයන ලෙස සුරක්‍ෂිතව නිෂ්පාදනය කළද, එය කේතනය කරන සංවර්ධකවරුන්ගේ මතකයන් තුළින් එය ඉවත්කළ නොහැකි බවයි. ඒ නිසාම බාහිර පාර්ශ්වයන් විසින් අදාළ සේවකයින්ව තර්ජනයට ලක්කර අදාළ තොරතුරු ලබාගැනීමේ අවදානමක් ඇපල් සමාගමට පවතියි.


ප්‍රභවය: ABC Breaking News

ඇපල් සමාගම හට උසාවි නියෝගයට පූර්ණ ප්‍රතිචාරයක් දැක්වීමට පෙබරවාරි 26 දක්වා කල් ලැබුණි.

පසුව, එම උසාවි නියෝගය පිළිබඳව මෝසමක් ඉදිරිපත් කරමින් ඇපල් ආයතනය පවසා සිටියේ “කේතනය යනු අදහස් ප්‍රකාශකිරීමේ ක්‍රමයක්” වන බව සහ, අදහස් ප්‍රකාශකිරීමේ අයිතිය පිළිබඳව ඇති නෛතික තත්ත්වය කේතනය සඳහා ද අදාළ වන බව පැවසීමෙනි.

ඇපල් සමාගම ඉදිරිපත් කළ මෝසමේ සංක්‍ෂිප්තය

ඇතැමුන්ගේ මතය මෙම “කේතනය භාෂාවකි” යන්න ප්‍රයෝගයක් බවත්, එය වත්මන් ගැටලුව හමුවේ ඇපල් ආයතනයට පිහිටක් නොවනු ඇති බවත් ය. මේ පිළිබඳ නවතම තොරතුරු ඉදිරි දිනවලදී ඔබ වෙත ගෙන ඒමට අපි බලාපොරොත්තු වෙමු.

අන්තර්ජාලය හරහා ගමන්කළ ගුරුත්වාකර්ෂණ තරංග

ගතවූ දින කීපයේම සියළු  දෙනා කතා කරන ගුරුත්වාකර්ෂණ තරංග පිළිබඳව ඔබට යම් අවබෝධයක් ඇතැයි අපි සිතමු. මේ අවධානය සමාජ ජාල සහ වෙනත් වෙබ්අඩවි තුළ ගුරුත්වාකර්ෂණ තරංග ගැන සිදුවූ කතාබහ වෙතටයි.

This is how LIGO solved a century old mystery!https://youtu.be/qnTug9sxnJE

Posted by TechTrack on Friday, 12 February 2016

Scientists just confirmed the detection of gravitational waves. This is one of the biggest discoveries of modern…

Posted by Mark Zuckerberg on Thursday, 11 February 2016

My congratulations to the LIGO team on their discovery of gravitational waves. It is a result that is at least as…

Posted by Stephen Hawking on Thursday, 11 February 2016

ගුරුත්වජ තරංග වල පැවැත්ම තහවුරු වේ!

සාමාන්‍ය සාපේක්‍ෂතාවාදය පිළිබඳව ප්‍රථමයෙන් ප්‍රකාශයට පත්වී දැනට වසර 100ක් ගතවී ඇති අතර, ඇල්බට් අයින්ස්ටයින් විසින් සිය සිද්ධාන්තයේ කොටසක් ලෙස අනාවැකි පලකළ ගුරුත්වජ තරංග වල පැවැත්ම මේ වනවිට තහවුරු වී ඇත.

“අපිට ගුරුත්වාකර්ෂණ තරංග අහුවුණා. අපි ඒක කළා,” LIGO හි විධායක අධ්‍යක්‍ෂක David Reitze පැවසීය. LIGO යනු Reitze පැවසූ ක්‍රියාව වෙනුවෙන්ම සාදන ලද නිරීක්‍ෂණාගාරයකි.

Reitzeට අනුව, කාල අවකාශයේ රැළිති ලෙස හැඳින්විය හැකි මෙම ගුරුත්වජ තරංග නිර්මාණය වී ඇත්තේ කළු කුහර දෙකක එකතුවකිනි. එක් කළු කුහරයකට සූර්යයන් 29ක ස්කන්ධයක් තිබී ඇති අතර; අනෙක සූර්යයන් 36ක ස්කන්ධයකින් සමන්විත වී ඇත. යුගලයටම බොහෝවිට කිලෝමීටර 50ක පමණ විෂ්කම්භයක් තිබී ඇත.

වසර බිලියනකට පමණ පෙරාතුව (LIGOට අනුව බිලියන 1.3) මෙම කළු කුහර යුගලය ආලෝකයේ වේගය මෙන් අඩක වේගයකින් ඝට්ටනය වී ඇත. ගුරුත්වජ තරංග සියලු දේ හරහා ගමන්කරයි. එබැවින් එම ඝට්ටනයේ ප්‍රතිඵලය පෘථිවියට ළඟාවීමට පෙර එවන් කාලයක් විශ්වය හරහා ගමන්කර ඇත.


 

කළු කුහර ඝට්ටනයේ කුරුළු නාදය

Reitze පැවසූ ලෙස, ගුරුත්වජ තරංග විසින් පෘථිවිය වටා ඇති අවකාශය “ජෙලි කුට්ටියක්” මෙන් සංකෝචනය සහ විස්තාරණය කරවයි. එසේ වුවද මෙම තරංග නිරීක්‍ෂණය කළහැක්කේ LIGO වැනි ප්‍රෝටෝනයකින් දහසකින් එකක් පමණ පරිමාණයේ විකෘති වීම් පවා මැනිය හැකි නිරීක්‍ෂකයකට පමණි. මෙම තරංග 2015 සැප්තැම්බර් 14 දින නිරීක්‍ෂණය කරන ලදී.

කළු කුහර ගැටෙන හඬ විද්‍යාඥයින් හට ශ්‍රවණය වී ඇත්තේ තත්පරයෙන් පහෙන්-එකක් පමණ පැවතුණු කුරුළු නාදයක් ලෙසිනි. ගුරුත්වජ තරංග යනු ධ්වනි තරංග වර්ගයක් නොවුණ ද, ඝට්ටනයේ අවසන් මිලිතත්පර කිහිපය (කළු කුහර අතර පරතරය කිලෝමීටර කිහිපයක් පමණක් වූ අවස්ථාව) තුළ එහි සංඛ්‍යාතයේ සිදුවූ වර්ධනය, අපට ශ්‍රවණය කළ හැකි සංඛ්‍යාත මට්ටමක් බව LIGO හි සේවය කරන ජෝර්ජියානු භෞතීයවේදිනී Deirdre Shoemaker පැවසුවාය.

LIGO යන්න විස්තර කර ඇත්තේ “තමා හරහා යන ගුරුත්වජ තරංග වල අතිශය කුඩා කම්පන නිරීක්‍ෂණය කිරීම සඳහා සියුම්ව නිර්මාණය කළ සර්වසම නිරීක්‍ෂක දෙකකින් යුතු පද්ධතියක්” ලෙසිනි (එක් නිරීක්‍ෂකයක් ලුසියානා ප්‍රාන්තයේ ලිවිංස්ටන්හි ද අනෙක වොෂින්ටන් ප්‍රාන්තයේ හැන්ෆර්ඩ්හි ද පිහිටා ඇත). මෙම ව්‍යාපෘතිය නිර්මාණය කළේ Caltech සහ MIT හි සිටින විද්‍යාඥයින් වන අතර අනුග්‍රහය දැක්වූයේ National Science Foundation විසිනි. කොලොම්බියානු විශ්වවිද්‍යාලයේ විද්‍යාඥයෙකු වන Szabolcs Marka පැවසූ පරිදි මෙය “අන්තරීක්‍ෂ මයික්‍රොෆෝනයක්” ලෙස සැළකිය හැකිය.


 

අයින්ස්ටයින්ගේ සංකල්ප

Albert Einstein

ඇල්බට් අයින්ස්ටයින්

ගුරුත්වජ තරංග පිළිබඳව අයින්ස්ටයින් අනාවැකි පළකළේ 1915දී ඔහුගේ සාමාන්‍ය සාපේක්‍ෂතාවාද සිද්ධාන්තයේදී ය. ඔහුට අනුව අවකාශ-කාලය යනු ‘කාලය’ ද තවත් එක් මානයක් පමණක් වන සිව්මානමය අවකාශයකි. ගුරුත්වජ තරංග යනු මෙකී අවකාශ-කාලයේ සිදුවන විකෘත වීම්/ කැලැතීම් ය.

කෙසේ වුවද, ඒම තරංග නිරීක්‍ෂණයට නම්, ඒවා (කළු කුහර දෙකක ගැටුමක් වැනි) යම් සුවිසල් සිද්ධියක ප්‍රතිඵලයක් ලෙස නිර්මාණය විය යුතුය.

කළු කුහර යනු ගුරුත්වාකර්ෂණ තරංග සංකල්පයේ මුදුන් මල්කඩකි. අද වනතුරු අපට දැකගත හැකිව තිබුණේ ඒවායේ පසු-විපාක පමණකි. කොටින්ම කළු කුහරය යනු උපග්‍රහණයක් පමණක් විය.

“ඒවයෙ පැවැත්ම ගැන වක්‍රාකාරව ලැබුණු සාක්‍ෂි ගොඩක් අපිට තිබුණා,” Shoemaker පවසයි. “ඒත් මේක තමයි කළු කුහර දෙකක් එකතුවීම අපි නිරීක්‍ෂණය කරන පළමු වතාව! අනික අපි දන්නවා එහෙම කළු කුහර යුග්මයක එකතුවක් ගැන අනාවැකි කියන්න පුළුවන් එකම ක්‍රමය ගුරුත්වාකර්ෂණ විකිරණය විතරයි කියලා. ගුරුත්වජව නැතුව වෙන කිසිම විදිහකට අපිට ඒක බලාගන්න බෑ.”

“අපිට දැන් විශ්වයට සවන්දෙන්න පුළුවන්”

LIGO ඇත්තටම නිවැරදි ද? අපිට සත්‍යලෙසම ගුරුත්වජ තරංග නිරීක්‍ෂණය වුණා ද?

විද්‍යාඥයින් සතුව five-sigma නැමැති සත්‍යාපන සම්මතයක් ඇත. LIGOහි සමීක්‍ෂකයන්ට අනුව මෙම තරංග සොයාගැනීම එම සම්මතයන් ද ඉක්මවා යයි!

“හොඳම කොටස ඒක නෙවෙයි,” මාධ්‍ය ප්‍රකාශයේ දී Reitze පැවසීය. “මම හිතන්නෙ අපි විශ්වයට අලුත් දොරකඩක් විවෘත කරනවා. ඒක තමයි ගුරුත්වජ තරංග තාරකා විද්‍යාව.”

“ඒක නිවැරදියි කියලා අපිවම පොළඹවගන්න අපිට මාස හයක් විතර ගියා,” Shoemaker කියයි. “අපේ යන්ත්‍ර වල සටහන් වෙච්ච සේරම දේවල් තේරුම්ගන්න පුළුවන් දේවල් බවට අර five-sigma සංකල්පෙටත් එපිටින් ගිහින් ඔප්පුවෙනවා.”

“අපිට දැන් පුළුවන් මේ විශ්වයෙ අපිට ඇහෙන්නෙ නැතුව තිබ්බ ප්‍රදේශ වලට ඇහුම්කන් දෙන්න. මේක (විද්‍යුත් චුම්භක වර්ණාවලියට වඩා වෙනස් වන) වෙනමම වර්ණාවලියක්. මේක අපි කලින් නිරීක්‍ෂණය කරපු කිසිම දෙයක් වගේ නෙවෙයි!”


 

අයින්ස්ටයිනුත් පුදුමවෙන්න තිබුණා

දශකයකට අධික කාලයක් ව්‍යාපෘතියට සම්බන්ධ වී සිටි, කොලොම්බියානු විශ්වවිද්‍යාල භෞතීයවේදී Marka පැවසුවේ, මෙම සොයාගැනීම අයින්ස්ටයින්ගේ සාමාන්‍ය සිද්ධාන්තයේ ඍජු අත්හදාබැලීම් වැනි දේට මුල පුරනු ඇති බවයි.

“භෞතික විද්‍යාඥයෙක් හැමතිස්සෙම බලන්නෙ යම් සිද්ධාන්තයක තියෙන අඩුපාඩුවක්. එහෙම අඩුපාඩු හොයන්න තියෙන එකම ක්‍රමය ඒක අත්හදාබලන එක,” Marka එසේ CNN වෙත පවසා ඇත. “අයින්ස්ටයින්ගෙ සිද්ධාන්තයෙ තවමත් අපිට කිසිම අඩුපාඩුවක් පේන්න නැහැ, සහ ඒක හරිම භයානකයි. භෞතිකවේදීන් අඩුපාඩු නැති සිද්ධාන්ත ගැන විශ්වාස කරන්නෙ නැතිතරම්, මොකද එතකොට අපිට කරන්න දෙයක් නැති වෙනවනෙ!”

හාස්‍යජනක කරුණ නම්, ගුරුත්වජ තරංග නිරීක්‍ෂණය කරනු ඇතැයි අයින්ස්ටයින් කිසිදා නොසිතීමයි.

“එයා හිතුවෙ ගුරුත්වජ තරංග කියන්නෙ අලංකාර නිමැවුමක්, ඒත් කාටවත් කිසිම දවසක නිරීක්‍ෂණය කරන්න බැරි තරම් ඉතා කුඩා තරංග වර්ගයක් කියලා,” Marka කීය.

First Dog On The Moon

ප්‍රභවය: The Guardian (First Dog On The Moon)

මූලාශ්‍ර: CNN

අන්තර්ජාලයේ නවතම ගොනු හුවමාරු තාක්‍ෂණය – WebTorrent

BitTorrent යනු peer-to-peer ප්‍රොටොකෝලය යටතේ ලොව පුරා ඉතා පුළුල්ව භාවිතා වන සන්නිවේදන ක්‍රමවේදයකි. ශ්‍රී ලංකාවේ අන්තර්ජාලය පරිහරණය කරන තරුණ ප්‍රජාවට නම් මෙය කිසිසේත් ආගන්තුක තාක්‍ෂණයක් නොවේ. මෙය කෙතරම් ජනප්‍රිය ක්‍රමයක් ද කිවහොත්, අන්තර්ජාලය තුළ මෙමගින් හුවමාරු වන දත්ත ප්‍රමාණය මැනීමට සිදුවී ඇත්තේ පෙටාබයිට් වලිනි. කෙසේවෙතත්, Netflix, Hulu වැනි ස්ට්‍රීමිං සේවාවන්ගේ ආගමනයත් සමග BitTorrent හි බලපරාක්‍රමය බිඳවැටීමට පටන්ගෙන ඇත.

WebTorrent යන නවතම තාක්‍ෂණය ඔබ වෙත පැමිණ ඇත්තේ මෙම සේවාවන් දෙක එකට සංයුක්ත කර, BitTorrent ජාලය හරහා ස්ට්‍රීමිං වීඩියෝ ස්ට්‍රීමිං පහසුකම ඔබ වෙත ලබා දීමටයි. ඔව්, WebTorrent යනු ඔබේ වෙබ් බ්‍රව්සරය වෙත ලැබෙන ලොව ප්‍රථම ස්ට්‍රීමිං ටොරන්ට් සේවාදායකය යි. එය ලියැවී ඇත්තේ අන්තර්ජාල භාෂාවෙන්, හෙවත් JavaScript වලිනි. මෙම ප්ලගිනය P2P සන්නිවේදනය සඳහා භාවිතා කරන්නේ ජනප්‍රිය TCP/uTP ප්‍රොටොකෝලය නොව WebRTC නම් වූ නවමු මෙවලමකි.

BitTorrent-WebTorrent

WebTorrent හි තාක්‍ෂණික පැතිකඩ

2002දී ආරම්භ වූ දා සිට, අන්තර්ජාලය හරහා විශාල ප්‍රමාණයේ ගොනු සංසරණය කරවීමේ ගැටලුවට සරල විසඳුමක් සැපයූවේ BitTorrent තාක්‍ෂණයයි. WebTorrent විසින් සිදුකෙරෙනුයේ මෙම BitTorrentහි මධ්‍ය හරයේ ඇති තාක්‍ෂණය, ස්ට්‍රීමිං තාක්‍ෂණය සමග ඒකාබද්ධ කරමින් ඔබ වෙත මෙම තාක්‍ෂණ මෙවලම් දෙකෙහිම වාසිය උදාකරලීමයි.

ස්ටැන්ෆඩ් විශ්ව විද්‍යාලයේ උපාධිධාරී, Feross Aboukhadijeh විසින් මෙම ව්‍යාපෘතිය හඳුන්වාදුන්නේ සිය ගණනක් වූ තවත් විවෘත-ප්‍රභව දායකයින්ගේ සහාය ද ඇතිව ය. වර්තමානයේ අප භාවිත කරන අන්තර්ජාලයේ විප්ලවයක් සිදුකිරීමට මෙම තාක්‍ෂණයට හැකිවනු ඇති බව ඔහු තරයේ විශ්වාස කරයි.

TorrentFreak අඩවියට අදහස් කළ දැක්වීමක දී ඔහු පැවසුවේ:

මට දැනිච්ච විදිහට ‘පරිශීලකයින්ගෙන් බලගැන්වූ වෙබ්අඩවි’—ඒ කියන්නෙ යම් අඩවියක් භාවිත කරන අය විසින්ම බර දරාගෙන සිටිනු ලබන අඩවි කියන සංකල්පය මාර විප්ලවකාරී එකක්. ඒක මේ කර්තෘ හිමිකම් අලවගෙන, හිරකරගෙන තියන්න ඕන මෘදුකාංගයක් නෙවෙයි! ඒ නිසයි මට මේ අදහස තව ටිකක් දියුණු කරන්න ඕන කියලා හිතුණෙ.

ඔහුට අවශ්‍ය වූයේ, P2P ප්‍රොටොකෝලය හරහා පරිශීලකයින් විසින් බලගැන්වූ YouTube වැනි සලරූ වෙබ්අඩවියක් නිර්මාණයට බව ඔහු වැඩිදුරටත් අදහස් දක්වමින් පැවසී ය. එවිට භාවිතකරන පරිශීලකයන් ගණන වැඩිවන තරමට අඩවිය වඩාත් ස්ථාවර සහ වේගවත් වනු ඇති. සරලව කිවහොත්—WebTorrent යනු අන්තර්ජාලය සඳහා වන BitTorrent සේවාදායකයකි. කිසිදු ස්ථාපනයක්, දිගුවක් හෝ බ්‍රව්සර් ප්ලගිනයක් මෙයට අනවශ්‍ය ය.

Browser-Support

ව්‍යාපෘතිය ගැන වැඩි විස්තර දැනගැනීමට, ආරම්භ කිරීමට හෝ WebTorrent ක්‍රියා කරන ආකාරය පිළිබඳව දැනගැනීමට WebTorrent.io අඩවියට පිවිසෙන්න.

විද්‍යාව ඔප්පුකිරීමට ජීවිතය අවදානමේ හෙළීම

භෞතිකවේදීන්, සහ පොදුවේ ගත් කල විද්‍යාඥයින්, යනු බොහෝ විට අවදානම් සහිත ක්‍රියා වල නිරතවන පිරිසක් නොවේ. විද්‍යාවේ උන්නතිය වෙනුවෙන් තම ජීවිතය පවා කැප කළ පුද්ගලයින් නැතුවාම නොවේ. එහෙත් අධ්‍යයන සහ පර්යේෂණ ක්‍ෂේත්‍ර වල කටයුතු කරන බොහෝ විද්‍යාඥයින්ගේ එදිනෙදා වැඩකටයුතු සැළකිය යුතු ලෙස භයානක ඒවා නොවේ.

එනමුදු හෞතිකවේදී Andreas Wahl විසින් භෞතික විද්‍යා නියමයක් ඔප්පු කිරීමට තරමක් අසාමාන්‍ය උත්සාහයක පසුගියදා නිරත වී තිබුණි. මෙහි ඇතුළත් වන සලරුවෙහි ඇත්තේ, මෙම නෝවීජියානු විද්‍යාඥයා විසින් ‘සිය වලිත කේන්ද්‍රය වෙත ළඟාවෙමින් වෘත්ත වලිතයේ යෙදෙන වස්තුවක කෝණික ප්‍රවේගය ක්‍රමයෙන් වැඩිවේ’ යන ප්‍රකාශය සත්‍යාපනයට දැරූ වෑයමකි. මෙම සංසිද්ධිය විද්‍යාත්මකව පැහැදිලි කර තිබෙන බැවින් මොහුගේ ජීවිතය අනතුරක නොතිබුණු බව ඔබට සිතිය හැක. එහෙත් මෙවන් ක්‍රියාවන් කිසි ලෙසකවත් නිවසේදී අත්හදා නොබැලිය යුතුය!

වටිනා ව්‍යාපෘති කළමනාකරණ මෙවලම් 5ක්

නියමාකාර ව්‍යාපෘති කළමනාකරණ මෘදුකාංගයකින් තොරව යම් ව්‍යාපෘතියකට අතගැසීම පසුව ඉතාමත් අනුවණ ක්‍රියාවක් වන අතර පසුකාලීනව මුළු ව්‍යාපෘතිය ම හිසරදයක් වීමට ද මෙය හේතු විය හැක. අධික පිරිසක් සමග ක්‍රියාත්මක වන විවිධ ව්‍යාපෘතීන් හීලෑ කරගැනීම ඉතාම අසීරු සහ මිල අධික බව ඔබ සිතිය හැක.

බියවිය යුතු නැත.

කුඩා ව්‍යාපාර සඳහා දැන් ඉතා සාර්ථකව සිය ව්‍යාපෘතීන් සංවිධානය කරගැනීමේ හැකියාව ඇත. වැදගත්ම කරුණ නම් මේවා බහුතරයක් නොමිල් ලබාදෙන සේවා වීමයි. ඒවා අතරින් ප්‍රධාන කීපයක් පහත ලැයිස්තුගත කර ඇති අතර, අදාළ සබැඳි භාවිත කර ඔබට වඩාත්ම ගැලපෙන සේවාව තෝරාගත් හැක.

5. Asana

logo_horiz1

ඔවුන්ගේ 40,000ක් වූ පාරිභෝගිකයින්ට සහ 400,000ක් වූ පරිශීලකයින්ට අනුව, Asana යනු දැනට ඇති ජනප්‍රියම ව්‍යාපෘති කළමනාකරණ අයදුමකි. මෙය පරිශීලකයින් 15 දෙනෙකු දක්වා නොමිලේ සහය දක්වයි.

Asana නිමවී ඇත්තේ ද ෆේස්බුක් ජාලයේ අනු-ප්‍රාරම්භක Dustin Moskovitz අතිනි. Asana යනු සරල කෘත්‍ය-කළමනාකරණ පද්ධතියක් වන අතර මෙය වඩාත් ප්‍රයෝජනවත් වන්නේ සජීවීව ගනුදෙනු කරන කණ්ඩායම් සඳහා යි.

asana-3

Asana විසින් තම පරිශීලකයින්ට සිය ඉලක්ක දෘශ්‍යමයව පෙන්වීමට අවස්ථාව ලබාදෙන අතර, කාලය කළමනාකරණයට, විවිධ කාර්යයන්ට ප්‍රමුඛත්වය දීමට සහ ව්‍යාපෘති යාවත්කාලීන වීම් වැඩසටහන තුලින්ම දැකගැනීමට ද අවස්ථාව ලබා දේ. මෙහි ඇති දින දසුන් විශේෂාංගය මගින් කණ්ඩායමේ ක්‍රියාකලාපය පාලක පුවරුවේ සටහන් කර තැබිය හැක.

කෙසේ වුවද Asana භාවිත කිරීමට ඔබට අන්තර්ජාල සබඳතාවක් තිබිය යුතුමය.

4. MeisterTask

MeisterTask-Logo-medium

මෙය පරිශීලකයින් සහ ව්‍යාපෘති ඕනෑම ප්‍රමාණයකට සහය දක්වන අතර, iPhone සහ iPad සඳහා මූලික අයදුම් ද ලබා දේ. නොමිලේ භාවිත කරන්නන් හට (Dropbox, GitHub, ZenDesk, Google Drive වැනි) සේවාවන් දෙකක් සම්බන්ධ කිරීමේ අවස්ථාව ලැබේ.

MeisterTask_projectboard_border_new

MeisterTask සතුව කාල කළමනාකරණය, ගැටලු කළමනාකරණය ඇතුළු සියළුම පාහේ වැදගත් විශේෂාංග පවතී. මෙහි දත්ත ගබඩා කිරීමේ සීමාවක් නොමැති අතර, මෙහි එන පාලක පුවරු අතිශය ලෙස රිසිකරණය කළහැක. සැකැස්ම ද ඉතාමත් චිත්තාකර්ෂණීය වන අතර සන්නිවේදන ක්‍රමවේදය Trelloහි මෙන් වුවද ඊට වඩා මදක් වේගවත් ය.

3. GanttProject

tmp

මෙය ද තවත් නොමිලේ ලබාදෙන විවෘත-ප්‍රභව සැලසුම්කරණ සහ කළමනාකරණ මෙවලමකි. මෙම පද්ධතියට Gantt සහ PERT වගු සෑදිය හැකි අතර, HTML හ PDF ගොනු ලෙස වාර්තා සකස් කිරීමට ද හැකිය.

GanttProject සමගින් ඔබට විවිධාකාර කාර්යයන් සිදුකරගත හැක. මෙමගින් පරිශීලකයින්ට ඉතා පහසුවෙන් ව්‍යුහගත කාලසටහන් නිර්මාණය කළහැකි අතර විවිධ කාර්යයන් බෙදාදීමට හා වැදගත් සිද්ධි සටහන් කිරීමටද අවස්ථාව ඇත.

2. Producteev

Producteev විසින් ඔබට ඕනෑතරම් පරිශීලකයින් සහ ව්‍යාපෘති හැසිරවීමේ හැකියාව ලබා දෙයි. ඔබට Outlook සමග සම්බන්ධවීමේ හෝ, පුද්ගලික සහය හෝ අතුරුමුහුණත රිසිකරණය කිරීමේ වුවමනාවක් නොමැති නම් වෘත්තිමය උත්ශේණියකට යෑමේ කිසිදු අවශ්‍යතාවක් නොමැත.

pdt_web_overview

මෙමගින් ලබාදෙන බොහෝ පහසුකම් අතර, කාර්ය ලැයිස්තු කීපයකට අයත් වන කාර්යයන් සෑදීම, පරිශීලකයින් අතර සජීවී සන්නිවේදන හැකියාව, ප්‍රතිඵල සහ ප්‍රගතිය මැනීමේ උපක්‍රම ආදිය ප්‍රධාන ය.

1. Freedcamp

සීමාරහිත පරිශීලක සහ ව්‍යාපෘති ප්‍රමාණයන්, සිත් ඇදගන්නාසුළු නිමාව, ගිණිය නොහැකි තරම් විශේෂාංග, පහසු සන්නිවේදනය, 200MB දක්වා (අවශ්‍ය නම් රු. 360 වැනි මාසික ගාස්තුවකින් 1GB දක්වා) ගබඩා පහසුකම්, යන සියල්ල නිසා Freedcamp පහසුවෙන්ම මෙම ලැයිස්තුවේ ප්‍රථම ස්ථනය ලබාගත්තේය.

Unload-Your-Inbox-from-Freedcamp-notifications-2-720x432

පරිපාලකයින් හට පරිශීලකයින්ගේ භූමිකා පාරිභෝගික තත්ත්වය දක්වා ම සීමා කළ හැක. Freedcamp විසින් කාල කළමනාකරණ, ආකෘති සහ ඉන්වොයිස් කිරීමේ පහසුකම් ද ලබා දේ.

මෙහි සමූහ විශේෂාංග ඉතාමත් සිත් ඇදගන්නාසුළු ය. ෆේස්බුක්හිදී මෙන් මෙහිදී ද යම් යාවත්කාලීන වීමක් සිදුවුවහොත් ඒ ගැන දැනුම්දීමක් පරිශීලකයාට ලැබේ. මෙහි ජංගම අයදුමක් නැති වුවද ඔවුන්ගේ වෙබ්අඩවිය ජංගම උපාංග වෙත සහය දක්වයි.


 

Zoho Projects, BamBam!, Bitrix24, Trello, 2-Plan යනු තවත් මෙවැනි මෘදුකාංග කීපයකි. එම වෙබ්අඩවි වලට පිවිසීමෙන් ඔබට අදාළ සේවාවන් ගැන අවබෝධයක් ලබාගත හැක.

මේවාට අමතරව ඔබ භාවිත කර ඇති වෙනත් ව්‍යාපෘති කළමනාකරණ මෙවලම් ඇත්නම්, ඒ පිළිබඳව සටහන් තැබීමට ප්‍රතිචාර පුවරුව විවෘතයි.

ඔබේ සාමාන්‍ය පරිගණකය touchscreen කරවන අයුරු

මෙම ස්පර්ශක-තිර යුගයේ යතුරුපුවරුවක් භාවිත කිරීම යම්කිසි අපහසුවක් ගෙනදෙන බව ඔබට හැඟෙන්නට පුළුවන. ස්මාට්ෆෝන් වුවද, ටැබ්ලට් පරිගණක වුවද අද වනවිට ස්පර්ශක-තිර බවට පත්වී ඇත.

මේ ස්පර්ශක-තිර විශේෂාංගය ශීඝ්‍රයෙන් ජනප්‍රිය වීමත් සමග, බොහෝ පරිගණක නිෂ්පාදන සමාගම් තම නිමැවුම් වලට මෙම විශේෂාංගය ඇතුළත් කිරීමට උත්සුක වෙති. ඒ කෙසේවෙතත් දැනට අප භාවිතා කරන සෑම ලැප්ටොප් පරිගණකයකම මෙම පහසුකම නැත.

එබැවින්, ඔබේ ඩෙස්ක්ටොප් හෝ ලැප්ටොප් පරිගණකයට ස්පර්ශක-තිර විශේෂාංගය බාහිරින් ඇතුළත් කරගැනීම සඳහා දැන් ඔබට AirBar ලෙස හැඳින්වෙන මෙම නවතම උපාංගය භාවිත කළ හැක.

Screen-Shot-2015-12-16-at-9.19.13-AM-1024x774

Neonode නම් ස්විස් ජාතික සමාගම විසින් ඔබ වෙත ගෙන එන මෙම AirBar උපාංගය ඔබේ පරිගණක තිරයේ පහළ දාරය සමග චුම්භක ක්‍ෂේත්‍රයක් මගින් සම්බන්ධ වන අතර, USB සබඳතාවක් හරහා සරලවම ඔබේ ස්පර්ශක-තිර නොවන නෝට්බුක්, ලැප්ටොප්, ඩෙස්ක්ටොප් පරිගණකය තුළින් දෘෂ්‍යමය ලෙස ස්පර්ශක-තිර අත්දැකීමක් ලැබීමට දැන් ඔබට හැකිය.

ඇඟිලි වල සෙලවීම් සහ හස්ත සංඥා ඒවාට අදාළ ඩිජිටල් ආදාන බවට පරිවර්තනය කරවන මෙම උපකරණය නිසා ඔබට එබීම (poking), තල්ලු කිරීම (swiping), බහු-ස්පර්ශනය (multi-touch) ආදී තවත් බොහෝ චලනයන් සාමාන්‍ය ස්පර්ශක තිර පරිගණකයකදී මෙන්ම අත්විඳීමට පුළුවන.

AirBar උපාංගය ක්‍රියා කරන්නේ හුදෙක් ආලෝකය ආධාරයෙන් බැවින්, ස්පර්ශ කිරීමට අමතරව, සාම්ප්‍රදායික ස්පර්ශක තිර ඔබට ඉඩ නොදෙන ආකාරයේ ක්‍රම වලින් පරිගණකය හා සන්නිවේදනයට ඔබට අවසර ඇත. උදාහරණයක් ලෙස අත්වැසුම් පැළඳ සිටින විටදී හෝ නැතහොත් චොප්ස්ටික්ස් කූරූ මගින් වුවද ඔබට මෙය භාවිත කළ හැක!

“AirBar උපකරණය ඔබේ පරිගණක තිරය මතුපිටින් අදෘශ්‍යමාන ආලෝක කදම්භයක් ප්‍රක්‍ෂේපණය කරනවා. ඒ කදම්භය තමයි ස්පර්ශ කිරීම සහ Windows 8, Windows 10 පද්ධති වල හස්ත සංඥා (gestures) සමග ගනුදෙනු කිරීම සිදුකරන්නෙ,” සමාගමේ නිළ වෙබ්අඩවියේ සඳහන් වෙයි. “මේ සේරම Neonode හි zForce AIR™ තාක්‍ෂණයට පිං සිද්ධවෙන්න තමයි. අපිට මේක පාවිච්චි කරලා නියම වැඩ කරන්න පුළුවන්! අපිට ඕනම උපකරණයකින් AirBar එක්ක වැඩ කරන්න පුළුවන් වෙලා තියෙන්නෙ, ආලෝකය ඕනෑම බාධකයකට ප්‍රතිචාර දක්වන නිසා.”

මෙයට කිසිම අමතර මෘදුකාංගයක් අනවශ්‍යය. මෙහි වත්මන් ආකෘතිය නිපදවා ඇත්තේ අඟල් 15.6 තිර සඳහා පමණි. මෙම උපාංගය තවමත් ක්‍රියා කරන්නේ Windows® 7, 8, 10 සහ Chrome OS™ මෙහෙයුම් පද්ධති මත පමණි. තවමත් OS X සමග නිවැරදිව ක්‍රියාකරන ආකෘතියක් නිපදවා නොමැත.

“මේ මොහොත වනවිට, OS X සමග නිවැරදිවම ක්‍රියා කරන්න පුළුවන් AirBar එකක් නිපදවලා නැහැ. ඒත් ඉතින් තමන් ළඟ දැනටමත් MacBook එකක් තියෙනවනම් මෙම උපකරණය කොච්චර දුරකට සාර්ථකව වැඩ කරනවද කියලා බලන්න ඔයාට පුළුවන්,” සමාගම කියයි.

මෙහි ඇති චුම්භක පටියත් සමග එන plug-and-touch ක්‍රියාකාරීත්වය නිසා ඕනෑම මොහොතක ඉතා පහසුවෙන් සවි කිරීම/ ඉවත්කිරීම කළ හැක. බැටරියට සිදුවන බලපෑමද මිනිය නොහැකි තරම් වන නිසා මෙය ඉවත්නොකර දිගටම භාවිතකිරීමේ විකල්පයද පරිශීලකයින්ට ඇත. නමුත් ලැප්ටොප් පරිගණකයකදී නම් වැසීමේදී ගැටලුවක් මතුවන නිසා භාවිතයෙන් පසුව ගලවා ඉවත්කිරීම නුවණට හුරුය.

ඔබට අන්තර්ජාලය හරහා Neonode AirBar උපකරණයක් පෙර-ඇණවුම් කළහැකි අතර එහි ආරම්භක මිල සටහන්ව තිබුණේ $49 (~7050Rs) ලෙසය. 2016 වසරේ ජනවාරි මස ලාස් වේගාස් හි පැවැත්වෙන CES උත්සවයේදී මෙම උපකරණය වෙළඳපලට හඳුන්වාදීමට නියමිත වී ඇත.